Dieta e supës me lakër është një dietë shtatëditore me pak kalori. Kjo dietë është shumë e njohur, sepse me të kilogramët humbin shumë shpejt (rreth 5 kg për 7 ditë).
Si ndikon dieta?
Disa njerëz vërtetojnë se lakra ka aftësinë për të djegur kalori. Për të ndjerë fuqinë e kësaj diete, duhet të hani supë me lakër çdo ditë në kombinim me disa ushqime shtesë. Supa përmban shumë pak kalori dhe ushqimi shtesë është i ndryshëm çdo ditë.
Kjo dietë është një zgjedhje e shkëlqyer për ata që vazhdimisht ndjejnë uri, sepse sasia e ushqimit që hani nuk është e kufizuar, dmth hani supë sa të doni dhe nga ushqimet e lejuara. Nga pijet mund të konsumoni çaj pa sheqer, kafe dhe ujë.
Si të përgatisni supë me lakër?
Përbërësit e nevojshëm:
- 1 lakër;
- 6 copa të mëdha qepë ose presh;
- 2 speca;
- lëng domate ose disa domate;
- majdanoz;
- kripë, piper i zi dhe pluhur kerri sipas dëshirës.
Mënyra e përgatitjes
Pritini perimet dhe vendosini në një tenxhere. Hidhni ujë mbi to. Shtoni erëzat dhe ziejini në zjarr të lartë për 10 minuta. Më pas zieni supën në zjarr të ulët derisa perimet të jenë gatuar. Mund të përdorni edhe karota.
Plani shtatëditor
Dita 1: Përveç supës me lakër, mund të hani sa të doni dhe çdo frut që dëshironi, me përjashtim të bananeve.
Dita 2: Përveç supës, përfshini perime (përveç fasuleve, misrit dhe bizele) në menunë tuaj. Patatet janë të kufizuara. Mund të hani një patate të pjekur me pak gjalpë.
Dita 3: Kombinoni supën me lakër me perime (përveç patateve) dhe fruta (përveç bananeve).
Dita 4: Përveç supës me lakër, ju lejohet të hani maksimum 8 banane dhe të pini qumësht pa yndyrë sa të doni.
Dita 5: Përveç supës, urinë mund ta plotësoni me 300-500 g mish viçi të pjekur në skarë dhe 6 domate të freskëta. Në këtë ditë pini 8 gota ujë.
Dita 6: Hani supë me lakër, mish viçi, pulë pa lëkurë dhe perime (përveç patateve).
Dita 7: Përveç supës mund të hani dhe orizit kaf, perime (pa patate) dhe të pini sa të doni lëng frutash 100% natyral.
Anët pozitive të dietës
Duke ndjekur këtë mënyrë të ushqyeri nuk ndiheni të uritur, sepse mund të hani sa të doni nga ushqimet e lejuara. Me këtë dietë, trupi pastrohet, kilogramët humbasin shpejt dhe nuk kërkon shumë burime për ta zbatuar atë.
Pas 7 ditësh, vazhdoni të bëni një jetë të shëndetshme dhe aktive për të qenë në top formë.
Anët negative të dietës
Disa ekspertë pohojnë se me këtë dietë humbet më së shumti ujë nga trupi, dhe asnjë yndyrë nuk digjet. Për shkak të kësaj, kilogramët kthehen lehtësisht.
Edhe pse mund të hani sa të doni nga ushqimet e lejuara, ato shpejt bëhen të neveritshme për ju. Ndërsa jeni në dietë ndiheni të lodhur dhe pa energji.
Kjo dietë mund të çojë në mungesë të disa vitaminave dhe mineraleve në trup, ndaj merrni ato në mënyrë shtesë.
Vërejtje! Kujdes: Dieta me supë me lakër duhet të përdoret vetëm për 7 ditë. Nëse dëshironi të vazhdoni me të, duhet të bëni një pushim prej të paktën 2 javësh, në mënyrë që trupi të rikuperohet. Dieta nuk rekomandohet për adoleshentët dhe fëmijët. Nëse keni ndonjë problem shëndetësor, konsultohuni me një mjek përpara se të filloni të ndiqni këtë dietë.
